በኦሮሚያ ክልል በተለያዩ ህገ ወጥ ድርጊቶች ተሳትፈዋል በሚል የተጠረጠሩ ከ500 በላይ ሰዎች በቁጥጥር ስር መዋላቸውን የክልሉ አስተዳደርና ፀጥታ ቢሮ አስታወቀ።

የቢሮው የኮሙዩኒኬሽን ጉዳዮች ሃላፊ አቶ በይሳ ኩማ በክልሉ የተለያዩ አካባቢዎች በቄሮ ስም የተለያዩ ህገ ወጥ ድርጊቶች መፈጸማቸውን አስታውሰዋል።

ከዚህ ጋር ተያይዞም በእነዚህ ድርጊቶች የተጠረጠሩ ከ500 በላይ ሰዎችን ካለፈው ሳምንት ጀምሮ በቁጥጥር ስር ማዋል መቻሉን አስረድተዋል።

ከዚህ ውስጥም ከ300 በላይ የሚሆኑት ለህግ ቀርበው ጉዳያቸው እየታየ መሆኑንም ጠቅሰዋል።

በተያያዘም በክልሉ ህብረተሰቡን እና የጸጥታ አካላትን ያሳተፈው የህግ የበላይነትን የማስከበሩ ስራ

ተጠናክሮ መቀጠሉን በኦህዴድ ማዕከላዊ ኮሚቴ ጽህፈት ቤት የገጠር ፓለቲካ አደረጃጀት ዘርፍ ሀላፊ አቶ አዲሱ አረጋ ገልጸዋል።

ሃላፊው በፌስ ቡክ ገጻቸው ባሰፈሩት ጽሁፍ የተለያዩ ህገ ወጥ ድርጊቶችን በመፈጸም የተጠረጠሩ ግለሰቦች በቁጥጥር ስር መዋላቸውን አስታውቀዋል።

ከዚህ ጋር ተያይዞም በጉጂ ዞን በቄሮ ስም መሬት ወረራ የፈጸሙ እና ያስፈጸሙ፣

ህገ ወጥ ኬላ በማቋቋም የትራንስፖርት እንቅስቃሴን ያስተጓጎሉ፣

መንግስት የሚሰጠውን ስልጣን ሁሉ በቄሮ መረጋገጥ አለበት በሚል ያነሳሱ ሰዎች በቁጥጥር ስር መዋላቸውን ተናግረዋል።

በባሌ ዞን የእርሻ ኢንቨስትመንት በማደናቀፍ በአጋርፋ፣ ጋስራ እና በጊኒርም በርካታ ሰዎች

በቁጥጥር ስር ውለው ችግሩ እንዲፈታ ተደርጓልም ነው ያሉት።

በቡኖ በደሌ ዞን ጮራ ወረዳ በአካባቢው የሚኖሩ የሌላ ብሄር ተወላጆችን የቡና እና

የጫት ምርቶች የመነጠሩ ሰዎች በቁጥጥር ስር መዋላቸውንም ገልጸዋል።

በጂማ ዞን ማና፣ ሊሙ ኮሳ፣ ጎማ እና ጉማይ ወረዳ በስርቆት፣ በህገ ወጥነት ግለሰቦች ላይ ጉዳት በማድረስ፣

የሰዎችን ቡና በመመንጠር ብሎም ቡዳ ነው በሚል ሰው የገገደሉ እና

ያስገደሉ ተጠርጣሪዎችም በቁጥጥር ስር ውለው ክስ ተመስርቶባቸዋል ብለዋል።

በቀጣይም በመሰል ድርጊቶች የተሳተፉ አካላትን በቁጥጥር ስር የማዋል ተግባሩ ተጠናክሮ እንደሚቀጥል ጠቅሰው፥

የህግ የበላይነትን በማስከበሩ ሂደት ህብረተሰቡ ላደረገው ድጋፍም ምስጋና አቅርበዋል።

በሌላ በኩል በኦሮሚያ ክልል የህግ የበላይነትን በማስከበር ረገድ ከህዝቡ ጋር

በመቀናጀት የተከናውኑ ተግባራት ውጤት እያስመዘገቡ መሆኑን የክልሉ ፖሊስ ኮሚሽን ገልጿል።

ከፋና ብሮድካስቲንግ ኮርፖሬት ጋር ቆይታ ያደረጉት የኦሮሚያ ፖሊስ ኮሚሽን ኮሚሽነር

የኮሙዩኒኬሽን ዳይሬክተር ረዳት ኮሚሽነር ሶሪ ዲንቃ፥ ባለፈው ሳምንት

ፊንፊኔ ዙሪያን ጨምሮ በተለያዩ አካባቢዎች ህገ ወጥ ድርጊቶች መስተዋላቸውን ተናግረዋል።

በተለይም በሃገሪቱ ለውጥ እንዲመጣ ከፍተኛ ትግል ያደረገውን ወጣት /የቄሮ/ ስም በመጠቀም

ግለሰቦች ሀሰተኛ ሰነዶች በማዘጋጀት የተለያዩ ህገ ወጥ ድርጊቶች መፈጸማቸውንም ነው የተናገሩት።

ረዳት ኮሚሽነሩ አሁን ላይ የህግ የበላይነትን በማስከበር ረገድ የፀጥታ አካላት በቁርጠኝነት እየሰሩ መሆኑን ጠቅሰው፥

ህዝቡና ቄሮዎችም የህግ የበላይነት እንዲከበር መረጃ በመስጠት ከፖሊስ ጋር በቅንጅት እየሰሩ ነው ብለዋል።

እስካሁን የህግ የበላይነት በመጣስ የተከናውኑና ወደፊት ሊከናውኑ የነበሩ የወንጀል እቅዶች ከክልሉ ፖሊስ እንዳላመለጡም አስረድተዋል።

በቀጣይም ህብረተሰቡና ቄሮዎች የህግ የበላይነትን የሚፈታተኑ ድርጊቶች ከመፈፀማቸው በፊትም ይሁን ከተፈፀሙ በኋላ

መረጃ በመስጠትና በጥቆማ የሚያደርጉትን ትብብር አጠናክረው እንዲቀጥሉም ጠይቀዋል።

በክልሉ የተለያዩ አካባቢዎች ከሳምንት በፊት ይስተዋሉ የነበሩ የህግ የበላይነት ጥሰቶች

አሁን ሙሉ በሙሉ በሚባል ደረጃ መቆማቸውንም ረዳት ኮሚሽነሩ አረጋግጠዋል።

FBC በሰርካለም ጌታቸው እና በላይ ተስፋዬ

LEAVE A REPLY

Please enter your comment!
Please enter your name here