በድሬደዋ አስተዳደር ባሳለፍናቸው ጥቂት ቀናት በከተማው ግጭቶችና ሁከቶች ሊፈጠሩ ይችላሉ በሚል በተለያዩ መሀበራዊ ሚዲያዎችና የተለያዮ የህብረተሰብ ክፍሎች የስጋት ሀሳቦች መመንጨታቸውን ተከትሎ ፖሊስ በወቅታዊ ጉዳይ ላይ መግለጫ መስጠቱ የሚታወቅ ነው::

ይህንንም ተከትሎ ፖሊስ ሌሎች የፀጥታ ሀይሎችና መላው ህብረተሰብ ባከናወናቸው ተግባራት ስጋቶቹን እያመከነ በከተማው አሁን ላይ ያለው አጠቃላይ የፀጥታ ሁኔታ በአስተማማኝ ደረጃ ላይ እንዲገኝ ያደረገ ሲሆን

ይህው የፀጥታ ሀይልና ህብረተሰብም ይህንኑ ሰላምና ፀጥታ አጠናክሮና የበለጠ አስጠብቆ በማስቀጠል ላይም ይገኛል ::በዚህም ፖሊስ ለመላው የአስተዳደሩ ነዋሪና ወጣቶች ምስጋናውንም ያቀርባል::

ይህ ይሁን እንጂ ከፀጥታ ማስፈንና የህግ የበላይነት ከማረጋገጥ ተግባር ጋር ተያይዞ እያጋጠሙ ያሉና ሊታረሙ የሚገባቸው ጉዳዮች እንዳሉም ልብ ሊባል ይገባል::

በመሆኑም አሁን ላይ ያለውን ሰላምና ፀጥታ ወደ ላቀ ደረጃ በማሸጋገር የተጀመሩ የለውጥ ሂደቶች ለማስቀጠል ብሎም የትርምስና የብጥብጥ አላማ ያላቸውን ሀይሎች ከምንጫቸው ለማድረቅና እኩይ ተግባራቸውን ለማምከን ዛሬም ይበልጥ ትኩረት መስጠትና ጥንቃቄ ማድረግ አስፈላጊ ሆኖ በመገኘቱ ፖሊስ በሚከተሉት ጉዳዮች ላይ ክልከላ የተደረገ መሆኑን ያሳውቃል::

1ኛ:-ለፖሊስና ለፀጥታ ሀይሉ አሳዉቆ ተገቢውን ባጅና መለያ ሳያደርጉና ሳይዙ በቡድን ተደራጅቶ የጥበቃ እገዛ ሰጪነን ብሎ መንቀሳቀስ

2ኛ:-በተናጥልም ይሁን በቡድን የስለት መሳሪያዎችን ይዞ መንቀሳቀስ

3ኛ:-ከአስተዳደሩ የፀጥታ ምክር ቤትና ከሚመለከተው አካል ፍቃድ ሳያገኙ ህዝባዊ ስብሰባ ማካሄድ የተከለከለ መሆኑን በጥብቅ ያሳስባል::

መላው የአስተዳደራችንም ነዋሪ ይህንኑ በመገንዘብና በመረዳት ለሰላሙና ለህግ የበላይነት መረጋገጥ እያደረገ ያለውን አስተዋፆና እያሳየ ያለውን እጅግ ከፍተኝ ትብብርና እገዛውን አጠናክሮ እንዲቀጥል ጨምሮ ፖሊስ ጥሪውን ያቀርባል::

መስከረም 12 ቀን 2011 አ.ም

የድሬደዋ አስተዳደር ፖሊስ ኮሚሽን

LEAVE A REPLY

Please enter your comment!
Please enter your name here