SANYO DIGITAL CAMERA

(ኤፍ ቢ ሲ) በወልዲያ ከተማ ተከስቶ የነበረው የፀጥታ ችግር ተቀርፎ ከተማዋ ወደቀድሞ መረጋጋቷ እየተመለሰች ነው።

ከትናንት በስቲያ በወልዲያ ከተማ የጥምቀት በዓል በመጠናቀቅ ላይ በነበረበት ወቅት በወጣቶችና በጸጥታ አካላት መካከል በተፈጠረ ግጭት የሰባት ሰዎች ህይወት አልፏል፤።

በማግስቱም የቤት ቃጠሎን ጨምሮ ግምቱ ያልታወቀ በርካታ ንብረት ወድሟል፤ ወደ ወልዲያ የሚያስገቡ እና የሚያስወጡ መንገዶችም ለረጅም ስዓታት ተዘግተው ቆይተዋል።

ከተማዋ በዛሬው እለት ግን የተሻለ መረጋጋት ታይቶባታል ነው የተባለው፤ በተለይም የክልሉ ርዕሰ መስተዳድር አቶ ገዱ አንዳርጋቸው ከከተማዋ ነዋሪዎች ጋር ከተወያዩ በኋላ ወደ መረጋጋት መመለሷን የክልሉ የመንግስት ኮሙዩኒኬሽን ጉዳዮች ቢሮ ሀላፊ አቶ ንጉሱ ጥላሁን ተናግረዋል።

ከ1 ሺህ በላይ ሰዎች የተሳተፉበት ውይይት ወጣቶች፣ የሀይማኖት አባቶች፣ የሀገር ሽማግሌዎች እና ልዩ ልዩ የህብረተሰብ ክፍሎችን ያካተተ ነበር።

በውይይቱ ህብረተሰቡ በደረሰው ጉዳት እጅግ ማዘኑንና ሁኔታው እዚህ ደረጃ መድረስ እንደሌለበት መግለጹን ነው አቶ ንጉሱ የገለጹት።

የጠፉ ጥፋቶች ምርምራ እንዲደረግባቸውና ጥፋት ያደረሱ አካላት ማንነት ይፋ ተደርጎ ህጋዊ እርምጃ እንዲወሰድ የሚሉ ጥያቄዎች ከውይይቱ ተሳታፊዎች ለርዕሰ መስተዳድሩ መነሳታቸውንም ይገልጻሉ።

ርዕሰ መስተዳድሩም ህብረተሰቡ ላነሳው ጥያቄ አፋጣኝ ምላሽ ለመስጠት ክልሉ ዝግጁ መሆኑን ለተወያዮቹ መግለጻቸውን አንስተዋል።

ህዝቡ ከአካባቢው የፀጥታ ሀይሎች ጋር በመሆን ሰላሙን ማስጠበቅ ይገባዋል ማለታቸውን የጠቀሱት አቶ ንጉሱ፥ መንግስት ጥፋተኞችን ምርመራ አድርጎ ለህዝቡ ይፋ በማድረግ እርምጃ እንደሚወስድ መግለጻቸውንም ጠቅሰዋል።

ለዘለቄታውም የአካባቢውንና የከተማዋን ሰላም ለማስጠበቅ የክልሉ መንግስት የህብረተሰቡን ጥያቄና ቅሬታ በማዳመጥ መፍታት እንደሚችልም አስረድተዋል።

በውይይቱ በተደረሰው ስምምነት መሰረትም በአሁኑ ወቅት በከተማዋ መረጋጋት ሰፍኖ ለሁለት ቀናት ተዘግተው የነበሩ መንገዶች ተከፍተው እንቅስቃሴ መጀመሩንም ገልጸዋል።

ፋና ብሮድካስቲንግ ኮርፖሬት ያነጋገራቸው የከተማ ነዋሪዎች እና የሀይማኖት አባቶችም ከተማዋ ወደ መረጋጋት መመለሷን ጠቅሰው፥ ህብረተሰቡ የአካባቢውን ሰላም ለማስጠበቅ የጀመረውን ጥረት እንዲቀጥል ጠይቀዋል።

መንግስትም የሚነሱ ችግሮችን ለነገ ሊላቸው አይገባም የሚል ሀሳብ አላቸው የከተማዋ ነዋሪዎች፤ ጥያቄዎቹን መፍታት እንደሚገባ በመጥቀስ።

እንደ ነዋሪዎቹ ገለጻ ከርዕሰ መስተዳድሩ ጋር ከተደረገው ህዝባዊ ውይይት በኋላ የነበረው ግርግር ተቀርፎ ከተማዋ ወደ ሰላሟ እየተመለሰች ነው::

በፋሲካው ታደሰና በዳዊት መስፍን

LEAVE A REPLY

Please enter your comment!
Please enter your name here