የኢሕአዴግ ስራ አስፈፃሚ ኮሚቴ ስብሰባ ከመጋቢት 2/2010 ጀምሮ እንዲሚካሄድ የኢሕአዴግ ምክር ቤት ፅ/ቤት ሃላፊ ጓድ ሽፈራው ሽጉጤ አስታወቁ።

የስራ አስፈፃሚ ኮሚቴውን ስብሰባ መጠናቀቅ ተከትሎም የኢሕአዴግ ምክር ቤት መደበኛ ስብሰባውን ያካሂዳል።

የኢሕአዴግ ስራ አስፈፃሚ ኮሚቴ በታህሳስ ወር ባካሄደው ስብሰባ ያስተላለፋቸው ውሳኔዎች በየብሔራዊ ድርጅቶች እንዴት እየተፈፀሙ እንዳሉ የሚገመግም ይሆናል።

በዚህም ሀገራችንን ያለችበትን ወቅታዊ ሁኔታና የጥልቅ ተሃድሶውን አፈፃፀም መነሻ በማድረግ ስራ አስፈፃሚው ያስተላለፋቸው ውሳኔዎችና ያስቀመጣቸው አቅጣጫዎች ያሉበትን ደረጃ ገምግሞ ቀጣይ አቅጣጫዎችን ያስቀምጣል።

የኢሕአዴግ ምክር ቤት በሚያካሂደው መደበኛ ስብሰባ በጳጉሜ ወር ላይ አስፅድቆት በነበረው የ6 ወር እቅድ አፈፃፀም ላይ ይመክራል።

በተጨማሪም የኢሕአዴግ ሊቀመንበር ጓድ ኃይለማርያም ደሳለኝ ያቀረቡትን የሃላፊነት መልቀቂያ ጥያቄ ተከትሎ የተፈጠረውን የአመራር ጉድለት እንደሚያሟላ ጓድ ሽፈራዊ ሽጉጤ ገልፀዋል።

በሌላ በኩል በኢሕአዴግ ሕገ ደንብ መሰረት የድርጅቱ ጉባዔ ከ2 አመት እስከ 2 አመት ከ6 ወር ባለው ጊዜ ውስጥ መካሄድ ሲገባው በፀጥታና ወቅታዊ ጉዳዮች የተነሳ ባለመካሄዱ ምክር ቤቱ በሕገ ደንቡ ላይ በተቀመጠለት ሃላፊነት መሰረት ጉባዔው የሚካሄድበትን ወቅት በስድስት ወራት እንዲያራዝም ጥያቄ ይቀርብለታል ብለዋል።

የሁሉም ብሔራዊ ድርጅቶች ማዕከላዊ ኮሚቴዎች የየብሔራዊ ድርጅቶቹ ጉባኤ በስድስት ወር እንዲራዘም ውሳኔ በማስተላለፋቸው እና አሁን በኢሕአዴግ ምክር ቤት ውሳኔ ላይ የሚሳተፉትም የብሔራዊ ድርጅቶቹ ማዕከላዊ ኮሚቴ አባላት በመሆናቸው ጥያቄው ተቀባይነት አግኝቶ እስከ ነሃሴ ወር ድረስ ሊራዘም እንደሚችል እምነታቸውን ገልፀዋል።

የኢሕአዴግ ስራ አስፈፃሚ ታህሳስ ላይ ባደረገው ውይይት ወቅታዊ ሁኔታዎችን ታሳቢ በማድረግ አስቸኳይ ጊዜ አዋጅ ተግባራዊ ሊሆን እንደሚችል በተባበረ ድምፅ ወስኖ እንደነበር ያስታወሱት ጓድ ሽፈራው፤ ከስብሰባው በኋላ በምስራቅ አማራ አካባቢዎች እና ኋላም በኦሮሚያ ክልል አንዳንድ አካባቢዎች የፀጥታ ችግር በመነሳቱ አዋጁ ተግባር ላይ መዋሉን ገልፀዋል።

በአንድ በኩል የአስቸኳይ ጊዜ አዋጁን ተግባራዊ ማድረግና የሃገሪቱን የፀጥታ ችግር ማስተካከል በሌላ በኩል ደግሞ የብሔራዊ ድርጅቶች የተናጠል ጉባዔዎችን ማካሄድ ወቅታዊ ስራዎች ስለነበሩ የኢሕአዴግ ስራ አስፈጻሚና የምክር ቤቱ ስብሰባዎች እስካሁን አለመካሄዳቸውን አንስተዋል።

በመሆኑም ከመጋቢት 2 ቀን ጀምሮ መደበኛ ስብሰባዎቹ የሚካሄዱ ይሆናል።

LEAVE A REPLY

Please enter your comment!
Please enter your name here